थप गरिएको अतिरिक्त समयमा फेररान टोरेसले गरेको निर्णायक गोलको मद्दतले स्पेनले साविक विजेता अर्जेन्टिनालाई १–० ले पराजित गर्दै २०२६ फिफा विश्वकपको उपाधि जितेको छ । अमेरिकाको न्यूजर्सी स्टेडियममा सम्पन्न सनसनीपूर्ण फाइनल भिडन्तमा जित निकाल्दै स्पेनले इतिहासमा दोस्रो पटक विश्वकपको ट्रफी आफ्नो नाममा गराएको हो । निर्धारित ९० मिनेटको खेलमा दुवै टोलीबाट कुनै गोल हुन नसकेपछि खेल अतिरिक्त समयमा धकेलिएको थियो । निर्धारित समयको अन्तिम मिनेटमा अर्जेन्टिनाका मुख्य मिडफिल्डर एन्जो फर्नान्डेज रातो कार्ड खाँदै मैदानबाट बाहिरिएपछि अर्जेन्टिना १० खेलाडीमा सीमित भएको थियो ।
    यसैको फाइदा उठाउँदै अतिरिक्त समयको १०६औँ मिनेटमा पेड्रो पोरोको क्रसलाई निको विलियम्सले हेडमार्फत पास मिलाएपछि फेररान टोरेसले उत्कृष्ट फिनिसिङ गर्दै स्पेनका लागि निर्णायक गोल गरे । यसअघि सन् २०१० मा पहिलो पटक फिफा विश्वकप जितेको स्पेनले १६ वर्षपछि पुनः फुटबलको सर्वोच्च उपाधि उचाल्न सफल भएको छ । युरो २०२४ को उपाधि जितेको स्पेनले आफ्नो उत्कृष्ट लयलाई निरन्तरता दिँदै विश्वकपको उपाधि समेत आफ्नो पोल्टामा पारेको हो । अर्कोतर्फ, लियोनेल मेसीको कप्तानीमा रहेको साविक विजेता अर्जेन्टिना लगातार दोस्रो पटक विश्वकप जितेर इतिहास रच्ने अवसरबाट चुकेको छ । इङ्ल्याण्ड तेस्रो भएको छ भने फ्रान्स चौथो भएको छ  ।
एम्बाप्पेलाई गोल्डेन बुट 
    फ्रान्सका स्टार फरवार्ड किलियन एम्बाप्पे फिफा विश्वकप फुटबलको इतिहासमा लगातार दुई संस्करणमा ‘गोल्डेन बुट’ जित्ने पहिलो खेलाडी बनेका छन् । २७ वर्षीय एम्बाप्पेले सन् २०२६ को विश्वकपमा १० गोल गर्दै यो ऐतिहासिक सफलता हात पारेका हुन् । सन् २०२६ को विश्वकपमा एम्बाप्पेले कुल आठ खेल खेल्दै १० गोल गरेका छन् । उनले आठ गोल गरेका अर्जेन्टिनाका कप्तान लियोनेल मेसीलाई पछि पार्दै गोल्डेन बुट हात पारेका हुन् । यसअघि कतारमा सम्पन्न सन् २०२२ को विश्वकपमा पनि एम्बाप्पे आठ गोलसहित सर्वाधिक गोलकर्ता बनेका थिए । लगातार दुई संस्करणमा गोल्डेन बुट जित्ने एम्बाप्पे पहिलो खेलाडी हुन् ।