धुलिखेल नगरपालिकाले धुलिखेल अस्पतालसँगको समन्वयमा स्वास्थ्य बीमा गरेका सबै नागरिकहरुका लागि अस्पताल परिसरबाटै प्रथम सेवा विन्दुकारुपमा सेवा प्रारम्भ गरेको छ । साउन २६ गते हिजो प्रारम्भ गरेको छ । स्वास्थ्य बीमा बोर्डले नागरिकहरुलाई प्रथम सेवा विन्दु मानेर यस अघि धुलिखेल अस्पताल राखेर बीमा गत श्रावण १ गतेबाट स्वास्थ्य बीमा बोर्डले सम्झौता विपरित प्रथम सेवा विन्दु परिवर्तन गरिदिए पछि नागरिकहरु स्वास्थ्य सेवाबाट बञ्चित हुनपुगेका थिए । ‘नागरिकहरुले पाएको दुःख र सास्तीलाई ध्यानकेन्द्रीत गरेर मध्यनजर गर्दै शुरुका दिनमा अस्पताललाई नै प्रथम सेवा विन्दु बनाउने गरी आवश्यक पहल कदम ग¥यौं’–नगर प्रमुख अशोक ब्याञ्जुले भन्नुभयो । ‘प्राथमिक स्वास्थ्य केन्द्रमा रहेको भौतिक पूर्वाधार तथा जनशक्तिको ब्यवस्थापन लगायतका कार्यहरु सुधार गर्नुपर्ने आवश्यकता रहेको थियो ।’
प्रधानमन्त्री केपी शर्मा ओलीलाई समेत ज्ञापन पत्र बुझाएको धुलिखेल नगरपालिकाले थप सहकार्य र समन्वयका लागि संघ र प्रदेश सरकारले समेत प्रतिवद्धता ब्यक्त गरेको नगर प्रमुख ब्याञ्जुले बताउनुभयो । पहिलो चरणमा विहान १० बजे देखि दिउँसो ३ बजेसम्म प्रारम्भ गरिएको सेवा आवश्यकताका आधारमा थप जनशक्ति समेतको ब्यवस्थापनमा परिवर्तन गर्न सकिने गरी तयारी गरिएको नगरपालिका स्वास्थ्य शाखा प्रमुख सन्दिप केसीले बताउनुभयो । यस अघि पनौतीका दुई वटा स्वास्थ्य केन्द्र मार्फत रिफरल सेवा उपलब्ध गराउँदै आएको छ । भकुण्डेमा रहेको मेथिन्कोट अस्पतालले पनि रिफरल सेवा उपलब्ध गराएको छ । पाँचखालले अझै सेवा शुरु गर्न सकेको छैन ।
२ सय बेसी सेवा ग्राही ८० लाई मात्र टोकन
धुलिखेल नगरपालिका र धुुलिखेल अस्पतालको समन्वय र सहकार्यमा अस्पताल परिसरमै हिजोबाट स्वास्थ्य बीमा गरेका सेवा ग्राहीलाई सेवा प्रवाह गरेको छ । विहान ७ बजे देखि लाइन बसेका २ सय बेसी स्वास्थ्य सेवा लिन आएकालाई ८० वटा टोकन मात्र विहान ९ः३० बजे वितरण गरेको थियो । स्वास्थ्य बीमा सेवा लिन आएका १ सय २० फर्के भने हिजो ८० जनाले मात्र रिफरल सेवा प्राप्त गरेको कुरा धुलिखेल नगरपालिका स्वास्थ्य सेवा शाखा प्रमुख सन्दीप केसीले जानकारी दिनुभयो । स्वास्थ्य बीमा सेवा अवरुद्ध भएको २६ दिनपछि सेवा सूचारु भएको हो । धुलिखेल प्राथमिक स्वास्थ्य केन्द्रबाट विगतमा दिदै आएको आधारभूत स्वास्थ्य सेवा प्रवाह गरिएको धुलिखेल–८ का अध्यक्ष विनोद गौतमले जनाउनुभयो ।